༄༅།།སའི་གོ་ལའི་ཟུངས་ཁྲག་ཁོ་ལོ་ཪ་ཌོ་གཙང་པོ་ཞེས་པའི་དངོས་འབྱུང་གློག་བརྙན་
འདི་ནི་ཨ་རིའི་ཁོ་ལོ་ར་ཌོ་གཙང་པོའི་འབྱུང་ཁུངས་ནས་མཚོ་ཁུག་བར་གྱི་ཟིན་བྲིས་
རང་བཞིན་གྱི་གློག་བརྙན་ཞིག་ཡིན་ཞིང་། ཨ་རིའི་མི་འབོར་འཕེལ་བ་དང་བསྟུན་
གཙང་པོའི་ཆུ་བེད་སྤྱོད་བྱེད་པ་ཚད་ལས་བརྒལ་ཡོད་སྟབས་ཁོ་ལོ་ར་ཌོ་གཙང་པོ་དེ་
ད་སྐབས་ཡང་ཡང་རྒྱ་མཚོ་དུ་བཞུར་རྒྱུ་མེད་པའི་གནས་ཚུལ་བྱུང་ཡོད།

གློག་བརྙན་འདིའི་ནང་དུ་ཆུ་ཡི་བདག་དབང་དང་། ཆུ་བགོ་བྱ་རྒྱག་པ། གཏེར་ཁ་འདོན་
ལས་ཆུ་ལ་གཙོག་སྐྱོན་ཤོར་བ། གཙང་པོའི་རྒྱུད་ཀྱི་ཡུལ་སྐོར་ལས་རིགས་དར་རྒྱས་དང་།
ཆུ་རགས་རྒྱབ་པ་སོགས་འགྲོ་བ་མིའི་བྱ་སྤྱོད་ཀྱིས་གཙང་པོ་འདིའི་མ་ལག་ཡོངས་སུ་
འགྱུར་བ་ཐེབས་པ་དང་། ཞིང་པ་དང་ཨ་རིའི་ས་གནས་ཡུལ་མི་༼ཨེན་དི་ཨན་༽
མི་རིགས་དང་དེང་རབས་ཀྱི་ཆུའི་རིག་པ་མཁས་ཅན་ཁག་ལ་བཅར་འདྲི་བྱས་ཡོད་པའི་
གློག་བརྙན་ཞིག་ཡིན།

གློག་བརྙན་འདི་ནི་བོད་ཡུལ་སྐྱེ་ཁམས་ཐེབས་རྩ་ཚོགས་པས་ཁོར་ཡུག་སྲུང་སྐྱོབ་ཀྱི་སློབ་
གསོའི་ཆེད་དུ་དམིགས་དེ་བཟོས་པ་ཞིག་ཡིན། བོད་ཡུལ་གྱི་ཆུ་ཆེན་དག་དང་སྐྱེ་ཁམས་
མ་ཟད་འཛམ་གླིང་ཡོངས་ཀྱི་ཆུ་ཆེན་དག་དང་ཁོར་ཡུག་ལ་གནོད་ཚེ་ཚབས་ཆེན་
ཕོག་བཞིན་པའི་དུས་འདིར་རང་རེའི་མི་རབས་གསར་བའི་སློབ་གསོའི་མཐུན་རྐྱེན་དང་
སྤྱི་ཚོགས་ལ་ཞབས་འདེགས་ཀྱི་ཆེད་དུ་བཟོས་པའང་ཡིན།

གློག་བརྙན་འདི་ནི་ད་ལྟ་DVD འོད་སྡེར་རུ་ཡོངས་སུ་གྲུབ་ཡོད་ཅིང་། དབྱིན་སྐད་
དང་བོད་སྐད་ཀྱི་འདེམས་ཀ་ཡོད་པར་མ་ཟད་འོག་ཏུ་བོད་ཡིག་ཀྱང་ཤར་ཐུབ་
པའི་འདེམས་ཀ་ཡོད་པ་བཟོས་ཡོད། མ་འོངས་པར་རྒྱ་ཡིག་གི་འདེམས་ཀ་ཡོད་པར་
བཟོ་ཐུབ་པའི་རེ་བའང་ཡོད།

Funding for Blood of the Earth: Colorado River has been provided by
Tibetan Ecology Foundation and Tibet International Council, Inc