༄༅།།ཁོར་ཡུག་ཉམས་རྒུད་ཀྱི་གནད་དོན་གླེང་བ།
རྩོམ་པ་བོ།
འཇིགས་མེད་བློ་གྲོས།
༤ གནམ་གཤིས་འགྱུར་ལྡོག་གི་རྒྱུ་རྐྱེན་ཤུགས་ཆུང་དུ་གཏོང་ཐབས་ཀྱི་ཐབས་ལམ་ལྔ་ནི།
༡། ནག་རྫས་[Carbon]གློད་གཏོང་ལ་དཔྱ་ཁྲལ་ལྗིད་མོ་འགེལ་དགོས་པ།
༢། རྡོ་སྣུམ་[Fossil Fuel]ལྟ་བུའི་ནུས་ཤུགས་བེད་སྤྱོད་ཆེད་དངུལ་གྱི་མཐུན་རྐྱེན་[Subsidy]སྦྱོར་རྒྱུ་བཀག་འགོག་བྱེད་པ།
༣། ཚད་མྱུར་པོས་ནུས་ཤུགས་སྲི་སྤྱོད་[Energy Efficiency]དང་འཛད་མེད་ནུས་ཤུགས་[Renewable Energy]བེད་སྤྱོད་ཀྱི་ལས་དོན་སྒྲུབ་དགོས་པ།
༤། ནག་རྫས་ལ་མ་བརྟེན་ཞིང་གནམ་གཤིས་འགྱུར་ལྡོག་སོགས་ཀྱི་གནོད་སྐྱོན་ཕོག་སླ་བ་མིན་པའི་གྲོང་ཁྱེར་[Resilient Cities]འཛུགས་སྐྲུན།
༥། འབྱུང་ཁམས་དང་འཚམ་པའི་ཞིང་ལས་ཐོན་སྐྱེད་[Climate-Smart Agriculture]ལག་བསྟར་བྱེད་པ་དང་ནག་གསེབ་ས་ཁུལ་བདག་གཅེས་ཚད་ལྡན་བྱེད་པ།
ཐབས་ལམ་ལྔ་པོ་དེ་དག་ལས་གསུམ་པ་དང་ལྔ་པ་ནི་མི་སྒེར་དང་ཚོགས་པ་བྱེ་བྲག་པས་ཀྱང་བསྒྲུབ་ནུས་སུ་ཡོད་ཅིང་། དེའི་དཔེ་མཚོན་ལྟ་བུར། འཛམ་གླིང་ཐོག་ཨོལ་གོར་ Al Gore ལྟ་བུ་ཁོར་ཡུག་ཉམས་རྒུད་སྲུང་སྐྱོབ་ཐད་ལས་དོན་རླབས་ཆེན་སྒྲུབ་པའི་ངོས་འཛིན་ཐོབ་པའི་སྙན་གྲགས་ཅན་གྱི་མི་སྣ་ཤིན་ཏུ་མང་པོ་བྱུང་ཡོད་པ་དང་། རང་རེ་བོད་རིགས་སྤྱི་དང་ལྷག་དོན་ཆོས་བྱེད་མི་སྣའི་ཁྲོད་ནས་ཀྱང་༸གོང་ས་སྐྱབས་མགོན་ཆེན་པོས་དབུས།ད་ལྟའི་ཆར་དཔལ་༸རྒྱལ་དབང་ཀརྨ་པ་རིན་པོ་ཆེ་མཆོག་དང་སྐྱབས་མགོན་འབྲུག་ཆེན་རིན་པོ་ཆེ་རྣམ་གཉིས་ལྟ་བུ་ཁོར་ཡུག་སྲུང་སྐྱོབ་ཀྱི་མཛད་འཕྲིན་དང་འབྲེལ་ནས་མཚན་སྙན་རྒྱས་བཞིན་པའི་མི་སྣ་གང་མང་ཐོན་བཞིན་ཡོད་པ་ནི་དུས་སྐབས་དང་མཐུན་པའི་འགྱུར་ལྡོག་ཅིག་དང་། ཆོས་བྱེད་མི་སྣ་ཚོའི་སྣང་བརྙན་ལ་གསར་དུ་ཐེབས་བཞིན་པའི་འགྱུར་ལྡོག་ཅིག་ཀྱང་ཡིན།
s
ཐེངས་འདིའི་༸རྒྱལ་དབང་ཀརྨ་པའི་ཨ་རིའི་ཆིབས་བསྐྱོད་སྐབས་ཀྱི་ཤེས་ཡོན་བསྟི་གནས་ཁག་ཏུ་གནང་དང་གནང་བཞིན་པའི་གསུང་བཤད་ཁག་གི་བརྗོད་དོན་གཙོ་གྲས་ཤིག་ཁོར་ཡུག་སྲུང་སྐྱོབ་དང་འབྲེལ་བའི་གནད་དོན་ཆགས་ཡོད་པ་དེས་ཁོང་གི་ཁོར་ཡུག་སྲུང་སྐྱོབ་དང་འབྲེལ་བའི་མཛད་འཕྲིན་ལ་རྒྱལ་སྤྱིའི་ཐོག་ནས་དོ་སྣང་དང་རེ་བ་ཇི་ཙམ་ཞུ་བཞིན་ཡོད་པ་མཚོན་ཐུབ།གོང་གསལ་ཐབས་ལམ་ལྔ་པོ་དང་འབྲེལ་ནས་གནམ་གཤིས་འགྱུར་ལྡོག་གི་ཤུགས་རྐྱེན་ཆུང་དུ་གཏོང་ཐབས་ཐད་ད་ལྟ་བར་མཉམ་འབྲེལ་རྒྱལ་ཚོགས་ཀྱི་འགན་འཁུར་འོག་ཚོགས་འདུ་སྣེ་མང་ཚོགས་ཤིང་། འདི་ལོ་ཡང་མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྐོར་གྱི་ཚོགས་ཆེན་ཞིག་སྤྱི་ཟླ་ ༡༡ པའི་ཚེས་ ༣༡ ནས་སྤྱི་ཟླ་ ༡༢ ཚེས་ ༡༡ བར་ཧྥ་རན་སིའི་རྒྱལ་ས་པེ་རི་སི་ལ་འཚོག་གཏན་འཁེལ་ཡོད། ཡར་རྒྱས་འགྲོ་བཞིན་པའི་རྒྱལ་ཁབ་ཁག་ཅིག་གིས་ཚོགས་འདུའི་གྲོས་ཆོད་ལ་ཚད་མཐོན་པོའི་ལག་བསྟར་དང་བརྩི་འཇོག་ཡོང་ཐུབ་མིན་ལ་མི་ལྟོས་པར་ཚོགས་ཆེན་འདི་དག་གིས་འགྱུར་ལྡོག་རིགས་ཤིག་ངེས་པར་འདྲེན་ཐུབ་རྒྱུར་ཡིད་ཆེས་བྱེད་ཆོག་པ་ཡིན།