༄༅།།ཆུ་རྩོད་འཐབ་འཁྲུག་གི་དུང་བརྡ་དང་པོ། རྫམ་ཆུ་རགས་ཆེན་མོ།

ལོཙྭ་པ། སྟག་ལྷ་རྒྱལ།

ཝང་ཝི་ལོའུ་ཡིས་བརྕམས། སྟག་ལྷ་རྒྱལ་གྱིས་བསྒྱུར།

༡ བོད་ལ་མཚོན་ན་དེ་ནི་འགྱེལ་ཐོག་རྡོག་བརྫིས་ཀྱི་འཕྲོག་བཅོམ་ལས་མ་འདས།
༢ བོད་ཆུ་ཕྱི་འདྲེན་བྱེད་རྒྱུར་འཐུས་གུ་ཚང་པའི་ལག་རྩལ་གྲ་སྒྲིག་བྱེད་པ།
༣ བོད་ལྗོངས་ཆུ་གློག་དར་སྤེལ་དང་ཁྱིམ་མཚེས་རྒྱལ་ཁབ་བར་ཆུ་རྩོད་འཐབ་འཁྲུག
༤ ཚོད་དཔག་དམའ་དྲགས་པས་བོད་ལྗོངས་གྱི་སྐྱེས་ཁམས་ཁོར་ཡུག་དང་ཐོན་ཁུངས་ལ་ཕོག་པའི་གནོད་འཚེ།


 

༧ཀུན་གཟིགས་པན་ཆེན་སྐུ་ཕྲེང་བཅུ་བ་ཆེན་མོ་མཆོག་གིས་བོད་ལྗོངས་ས་ཁུལ་དུ་ཆུ་ཤུགས་གློག་ཁང་དང་ཆུ་མཛོད་ཆུ་རགས་སོགས་བསྐྲུན་རྒྱུར་ངོ་རྒོལ་ཤུགས་དྲག་གནང་ཡོད་པ་དང་། གལ་ཏེ་ཆུ་རགས་བརྩིག ཆུ་མཛོད་བསྐྲུན་ཚེ། བོད་མདོ་དབུས་མཐོ་སྒང་གི་སྐྱེས་ཁམས་ཁོར་ཡུག་ལ་ཟློག་ཐབས་བྲལ་བའི་ཕུགས་སྐྱོན་དང་གནོན་འཚེ་ཐེབས་རྒྱུར་ཐུགས་འཁྲལ་གནང་ཡོད།
ད་ལྟ། རྫམ་ཆུ་ཤུགས་གློག་ཁང་[藏木水电站]གིས་གློག་ཐོན་སྐྱེད་བྱེད་འགོ་དངོས་སུ་ཚུགས་ཡོད་པས། བོད་ལྗོངས་སུ་ཆུ་ཤུགས་གློག་ཁང་གཞི་རྒྱ་ཆེན་པོས་བསྐྲུན་རྒྱུའི་དུང་བརྡ་བརྒྱབས་པ་རེད། དེ་དང་ཆབས་ཅིག་རྒྱ་ནག་དང་ཁྱིམ་མཚེས་རྒྱལ་ཁབ་བར་ཆུ་རྩོད་འཐབ་འཁྲུག་གི་གཡུལ་འགོ་ཡང་བསླངས་པ་རེད།

༡ བོད་ལ་མཚོན་ན་དེ་ནི་འགྱེལ་ཐོག་རྡོག་བརྫིས་ཀྱི་འཕྲོག་བཅོམ་ལས་མ་འདས།
རྒྱ་ནག་གཞུང་གཉེར་ཧྭ་ནེང་ཀུང་སིས་[由华能集团]མ་རྩ་བཙུགས་ནས་བཟོ་བསྐྲུན་བྱས་པའི་རྫམ་ཆུ་རགས་ཆེན་མོ་ནི་ཡར་ཀླུང་གཙང་པོའི་སྟེང་འཆར་བཀོད་ལྟར་འཛུགས་སྐྲུན་བྱས་པའི་ཆུ་ཤུགས་གློག་ཁང་ཆེད་བསྐྲུན་པའི་ཆུ་རགས་བཟོ་བཀོད་དང་པོ་དེ་ཡིན།
སྤྱི་ལོ་ ༢༠༡༤ ཟླ ༡༡ ཚེས ༢༣ ཉིན། རྫམ་ཆུ་ཤུགས་གློག་ཁང་གིས་གློག་ཐོན་སྐྱེད་ཀྱི་མགོ་བརྩམས་ཡོད་པས། དུས་དེ་ནས་བཟུང་རྒྱ་ནག་དམར་གཞུང་གིས་དབང་བསྒྱུར་འོག་གི་ཀྲུང་གོ་ཞེས་པའི་ས་ཆེན་དེའི་སྟེང་ན་ཆུ་རགས་བསྐྲུན་མེད་པའི་རང་བྱུང་གི་ཆུ་བོ་གཅིག་ཀྱང་ལྷག་མེད།



རྒྱ་ནག་གཞུང་གིས་ཡར་ཀླུང་གཙང་པོའི་དཀྱིལ་རྒྱུད་ཟངས་རི་རྫོང་དང་རྒྱ་ཚ་རྫོང་གི་བར་གྱི་གྲོག་རོང་འགག་རྒྱུད་དུ་ཚད་རིམ་ལྔ་ཅན་གྱི་ཆུ་མཛོད་ཆུ་རགས་བཟོ་བསྐྲུན་བྱ་རྒྱའི་འཆར་གཞི་བཀོད་ཡོད་པ་དང་། རྫམ་ཆུ་ཤུགས་གློག་ཁང་གི་ཆུ་རགས་དེ་ཚད་རིམ་བཞི་བ་ཡིན་ཞིང་། རྫམ་ཆུ་རགས་བསྐྲུན་པའི་དམིགས་ཡུལ་ནི་གློག་ཐོན་སྐྱེད་དང་། ཆུ་ལོག་སྔོན་འགོག ཞིང་ཆུ་འདྲེན་པ་བཅས་ཡིན་ལུགས་འགྲེལ་བརྗོད་བྱས་འདུག

རྒྱ་ནག་གི་རྒྱལ་ཁབ་གློག་དྲྭ་བོད་ལྗོངས་གློག་ཤུགས་ཀུང་སིའི་འགན་འཛིན་ལིའུ་ཞོ་མེང་[中国国家电网西藏电力有限公司董事长刘晓明]གི་བརྗོད་པར་གཞིགས་ན། རྫམ་ཆུ་ཤུགས་གློག་ཁང་གི་གློག་ཐོན་སྐྱེད་བྱེད་འགོ་ཚུགས་པ་དེས་བོད་རྒྱའི་གློག་དྲྭའི་གློག་མཁོ་འདོན་གྱི་དཀའ་ཁག་རྩ་བ་ནས་སེལ་ཡོད་ལུགས་རེད། འོན་ཀྱང་། དོ་དམ་པའི་རྫམ་ཆུ་ཤུགས་གློག་ཁང་གི་དམིགས་ཡུལ་གཙོ་བོ་ནི་བོད་ཁམས་མཐོ་སྒང་གི་གཏེར་ཁ་སྔོག་འདོན་ལས་གཞི་ལ་མཐུན་རྐྱེན་རོགས་འདེགས་ཀྱི་སླད་དུ་རེད། དཔེར་ན། གསེར་དང་། ཟངས་ཀྱི་གཏེར་ཁ་སོགས། དེ་དང་མཉམ་དུ་བོད་ཀྱི་གློག་ཤུགས་ཕྱི་ཕྱོགས་སུ་ཚོང་བསྒྱུར་ཆེད་ལག་རྩལ་གྱི་ཐད་ནས་གྲ་སྒྲིག་བྱེད་ཀྱིན་པ་རེད།

རྫམ་ཆུ་རགས་ཀྱི་རགས་ཆེ་ཤོས་ཀྱི་མཐོ་ཚད་ལ་གོམ་པའམ་སྨི ་[/meter]༡༡༦ ཡོད་ཅིང་། ཆུ་རགས་ཀྱི་ཤོང་ཚད་ལ་སྨི་གྲུ་བཞི་ལྷམ་པ་[亿立方米/ Cubic meter]དུང་ཕྱུར་ ༠.༨༦༦ ཡོད་པ་དང་། བཟོ་བཀོད་ཀྱི་དཔལ་འབྱོར་ཁེ་ཕན་ཁོ་ནའི་ཐད་ནས་དཔྱད་ཞིབ་བྱས་ཀྱང་། འཕྲུལ་འཁོར་གྱི་བོངས་ཚད་ནི་སྟོང་ཝྭ་[kilowatts]ཁྲི་༥༡ ཡིན་ལ། མ་རྩར་རྒྱ་ནག་གི་སྒོར་མོ་དུང་ཕྱུར ༩༦ གནས་ཡོད༼མ་རྩའི་མང་ཤོས་རྒྱ་ནག་དབུས་གཞུང་གིས་བཏོན་འདུག༽། སྟོང་ཝྭ་རེ་རེའི་གློག་འདོན་འཕྲུལ་འཁོར་གྱི་བོངས་ཚད་ཀྱི་མ་རྩ་ནི་ ༡༩༢༠༠ ཡིན་ཞིང་། རྫམ་ཆུ་ཤུགས་གློག་ཁང་གི་སྤྱིའི་འགྲོ་གྲོན་ལ་འགྲོ་སོང་ཆེན་པོ་ཤོར་བའི་འབྲི་ཆུ་འགག་གསུམ་གྱི་ཆུ་རགས་ཆེན་མོའི་མ་རྩའི་ལྡབ་གཉིས་གནས་ཡོད།

བཟོ་སྐྲུན་མ་རྩར་འགྲོ་སོང་ཆེན་པོ་བཏང་བའི་དབང་གིས་གློག་རིན་ཡང་དེ་བཞིན་དུ་མཐོན་པོ་གནས་ངེས་ཡིན། ནང་ཁུལ་གྱི་བརྒྱ་ཆའི་བཅུ་ཡི་མ་རྩའི་ཁེ་སྤོགས་ལྟར་རྩིས་བརྒྱབས་ན། རྫམ་ཆུ་ཤུགས་གློག་ཁང་བཟོ་བཀོད་ཀྱི་གློག་རིན་གྱི་མ་གནས་ནི་སྟོང་ཝྭ་དུས་ཚོད་རེ་རེར་སྒོར་ ༠.༣༨༤ གནས་ཀྱིན་ཡོད་པས། རྒྱ་ནག་ནང་ལོགས་ས་ཁུལ་གྱི་གློག་རིན་གྱི་མ་གནས་སྟོང་ཝྭ་དུས་ཚོད་རེ་རེར་ ༠.༢༥འི་ཚད་གཞི་ལས་མཐོ་ཞིང་། དེ་བོད་ལ་མཚོན་ན་འགྱེལ་པའི་ཐོག་རྡོག་བརྫིས་བྱས་པའི་དཔེ་བཞིན་འཕྲོག་བཅོམ་ལས་གཞན་ཅི་ཞིག་ཡིན་ནམ། དེ་བཞིན་དཔྱ་ཁྲལ་འཇལ་མཁན་རྒྱ་རིགས་མི་དམངས་ལ་མཚོན་ན་ཡང་དྲང་བདེན་ཞིག་ཡེ་ནས་མིན།

དོན་དངོས་སུ་བོད་ཁུལ་དུ་ཉི་མའི་འོད་ཀྱི་ནུས་ཤུགས་དང་། རླུང་ཤུགས། ས་དྲོད་ནུས་ཤུགས་སོགས་ཕུན་སུམ་ཚོགས་པ་ཡོད། གལ་སྲིད་སྒོར་མོ་དུང་ཕྱུར ༩༦ བཀོལ་ནས་ཉི་མའི་ནུས་ཤུགས་སྤྱད་ནས་གློག་བཏོན་པ་ཡིན་ན། ལོ་རེ་རེའི་གློག་འདོན་བོངས་ཚད་དེ་རྫམ་ཆུ་ཤུགས་གློག་ཁང་ལས་སྟོང་ཝྭ་དུས་ཚོད་དུང་ཕྱུར ༢༥ ལས་མང་པོ་འདོན་ཐུབ། གལ་ཏེ་སྒོར་མོ་དུང་ཕྱུར ༩༦ གིས་བོད་མི་ཚོར་ཁང་པ་ལྗང་ཁུ་ཞེས་པའི་གནོད་འཚེ་མེད་པའི་སྡོད་ཁང་དང་། ཉི་མའི་ནུས་ཤུགས་དང་རླུང་ཤུགས་ཀྱི་གློག་ཐོན་སྐྱེད་བྱེད་པ། ས་དྲོད་ལས་ཚ་དྲོད་བླངས་ཚེ།  ཁྱིམ་ཚང་གིས་ནུས་ཤུགས་དག་གཙང་རྐྱང་བེད་སྤྱོད་བྱས་ཡོད་པ་མ་ཟད། ད་དུང་གློག་དྲྭར་མཁོ་འདོན་བྱེད་རྒྱུའི་གློག་ལྷག་མའང་ཡོད།

ཉེ་བའི་ལོ་བཅུ་ཕྲག་ཁ་ཤས་སུ་རྒྱ་ནག་གི་རྒྱལ་དམངས་ཐོན་སྐྱེད་བསྡོམས་ཐང་(GDP)མགྱོགས་མྱུར་ངང་འཕར་ཡོད་ལ། གཞི་རྒྱ་ཆེན་པོས་རྨང་གཞིའི་སྒྲིག་བཀོད་འཛུགས་སྐྲུན་བྱས་པ་ནི་དཔལ་འབྱོར་འཕེལ་རྒྱས་ཀྱི་རྟེན་ས་གཙོ་དེ་ཡིན་ལ། འཕེལ་རྒྱས་དེའི་ནང་དུ་ཆུ་མཛོད་ཆུ་རགས་སོགས་འཛུགས་སྐྲུན་ལ་མ་རྩ་འབོར་ཆེན་བཙུགས་པའང་ཐེ་ཡོད།

རྒྱ་ནག་དབུས་གཞུང་ལ་ “ནུབ་རྒྱུད་དར་སྤེལ་ཆེན་མོ ”ཞེས་པའི་འཆར་གཞི་ཞིག་ཡོད་པ་དང་། འཆར་གཞི་དེའི་ནང་གི་གཙོ་ཆེ་ཤོས་དེ་ཆུ་ཤུགས་གློག་འདོན་དར་སྤེལ་རེད། ཐོག་མའི་དུས་སྐབས་སུ་དར་སྤེལ་བྱེད་ཡུལ་གཙོ་བོ་བོད་ཀྱི་མཐའ་མཚམས་ས་ཁུལ་དུ་སྤེལ་འདུག དཔེར་ན། སི་ཁྲོན་དང་ཡོན་ནན་སོགས། སྐབས་དེར་བོད་རང་སྐྱོང་ལྗོངས་དུ་ཆུ་མཛོད་ཆུ་གློག་རིགས་དར་སྤེལ་བྱེད་མི་ཐུབ་པའི་རྒྱུ་རྐྱེན་གཙོ་བོ་ཞིག་ནི་ས་གནས་བོད་མིའི་ངོ་རྒོལ་བྱས་པ་དང་། ནང་སྒོས་སུ་ ༧ ཀུན་གཟིགས་པན་ཆེན་རིན་པོ་ཆེ་མཆོག་གིས་བོད་ཁུལ་དུ་ཆུ་རགས་གློག་འདོན་གྱི་བཟོ་སྐྲུན་ལ་ངོ་རྒོལ་དང་བཀག་འགོག་བྱས་པས་རེད།

པན་ཆེན་རིན་པོ་ཆེ་མཆོག་གིས་བོད་ཁུལ་དུ་ཆུ་རགས་གློག་འདོན་ལས་རིགས་སྤེལ་ཚེ་བོད་ཀྱི་སྐྱེས་ཁམས་ཁོར་ཡུག་དང་གནམ་གཤིས་ལ་གནོན་འཚེ་ཐེབས་རྒྱུར་ཐུགས་འཁྲལ་གནང་བ་ཤར་སྟག་རེད། དེ་འདྲའི་དབང་གིས་བར་སྐབས་ཤིག་ཏུ་བོད་ལྗོངས་སུ་ཆུ་རགས་ཆུ་གློག་རིགས་འཛུགས་སྐྲུན་བྱེད་མ་ནུས་པར་ལྷག་འདུག ཡིན་ན་ཡང་། པན་ཆེན་རིན་པོ་ཆེ་མཆོག་དགོངས་པ་རྫོགས་རྗེས། སྐབས་དེའི་རྒྱ་ནག་གི་སྲིད་བློན་ལའེ་ཕིང་[李鹏]གིས་ཡར་འབྲོག་གཡུ་མཚོའི་ཆུ་ཤུགས་གློག་འདོན་གྱི་བཟོ་སྐྲུན་ལས་དོན་དེ་བོད་རང་སྐྱོང་ལྗོངས་ས་གནས་གཞུང་ལ་འཚམས་རྟགས་ཀྱི་ཚུལ་དུ་ཕུལ་ཞིང་། དེ་དང་བསྟུན་ནས་དྲག་ཆས་ཉེན་རྟོག་དམག་ཆུ་གློག་རུ་ཁག་དེ་བཟོ་སྐྲུན་རུ་ཁག་གི་ངོ་བོས་བོད་ལྗོངས་སུ་བསླེབས།

༢ བོད་ཆུ་ཕྱི་འདྲེན་བྱེད་རྒྱུར་འཐུས་གུ་ཚང་པའི་ལག་རྩལ་གྲ་སྒྲིག་བྱེད་པ།

◄ མདུན།  རྒྱབ། ►